Civilian in Hsaw Htit Township hiding in forest in fear of Tamadaw airstrike

လါအ့ဖြ့ၣ် ၇ သီ ၂၀၂၁ နံၣ်, သူလ့ၤတၢ်ကစီၣ်
ဖဲလါမးရှး ၂၇ သီ ၂၀၂၁ နံၣ်န့ၣ် သုးမီၤစိရိၤ အကဘီယူၤဒုးသုးတဖၣ် ဟဲယူၤဝဲဒၣ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ချၢၣ်လွံၢ်ထူၣ် ဆီထံးကီၢ်ဆၣ် အဟီၣ်ကဝီၤအပူၤန့ၣ်လီၤ. ဖဲလါမးရှး ၃၀ နံၤ ဂီၤ ၁၁း၄၅ မံးနံးန့ၣ် ခးလီၤဝဲ မ့ၣ်ပိၢ်ဖဲ မိၢ်တမး ၃ ဖျၢၣ် ဒီး ပှၤသံတ့ၢ် (၇) ဂၤ, ဟဲက့ၤသံလၢကျဲ (၂) ဂၤ, ဘၣ်ဒိ ၅ ဂၤန့ၣ်လီၤ. စးထီၣ်လၢ လါမးရှး ၂၇ သီ တုၤလါအ့ဖြ့ၣ် ၃ သီန့ၣ် ကဘီယူၤ ဒုးသုးတဖၣ် ဟဲဆှၣ်တၢ် ဒီး ခီဖျိဘၣ်ဝဲ ကီၢ်ရ့ၣ်ချၢၣ်လွံၢ်ထူၣ် ဆီထံးကီၢ်ဆၣ် ဟီၣ်ကဝီၤပူၤခဲလၢၥ် ၁၉ ဘျီန့ၣ်လီၤ.
လါမးရှး ၂၈ သီ ၂၀၂၁ နံၣ်နံၤ ကီၢ်ရ့ၣ်ချၢၣ်လွံၢ်ထူၣ် ဆီထံးကီၢ်ဆၣ် ထံဖိကီၢ်ဖိတဖၣ် ဘၣ်ဃ့ၢ်အိၣ်ခူသူၣ်လၢ ပှၢ်လၥ်ကျါန့ၣ်လီၤ. ခီဖျိလၢ ကဘီယူၤဒုးသုးတဖၣ် ဟးဝ့ၤဝီၤဒ်အံၤအဃိ ကဲထီၣ်ဝဲ တၢ်ဘၣ်ယိၢ်ဘၣ်ဘှီ တၢ်လီၤပျံၤလီၤဖုးလၢ လီၢ်ကဝီၤထံဖိကီၢ်ဖိတဖၣ် အဂီၢ်န့ၣ်လီၤ. ကီၢ်ရ့ၣ်ချၢၣ်လွံၢ်ထူၣ် ဆီထံးကီၢ်ဆၣ် လီၢ်ကဝီၤ ထံဖိကီၢ်ဖိလၢ အဘၣ်ဃ့ၢ်အိၣ်ကဒုတဖၣ် သဝီခဲလၢၥ် ၁၅ ဖျၢၣ် ဒီး ပှၤနီၣ်ဂံၢ်ခဲလၢၥ် (၉၀၀) ဘျဲၣ် ဘၣ်ဃ့ၢ်အိၣ်သဒၢ လၢပှၥ်လၥ်ကျါန့ၣ်လီၤ.
ခီဖျိလၢ ပယီၤသုးကဘီယူၤ တၢ်မၤဒ်အံၤအဃိ ကဲထီၣ်တၢ်ကီတၢ်ခဲလၢ ထံဖိကီၢ်ဖိကမျၢၢ်တဖၣ်အဂီၢ် အါမးန့ၣ်လီၤ. ဖိဒံဖိသၣ် သူၣ်က့သးပှၢ်တဖၣ် ကမျၢၢ်ဖိသ့ၣ်တဖၣ် ကဲထီၣ်တၢ်ကီတၢ်ခဲလၢ တၢ်အိၣ်တၢ်ဆိး တၢ်အီၣ်တၢ်အီ, တၢ်အိၣ်ဆူၣ်အိၣ်ချ့ သ့ၣ်တဖၣ်န့ၣ်လီၤ.
ဖဲလါအ့ဖြ့ၣ် ၅ သီ ၂၀၂၁ နံၣ်န့ၣ် ဒူသဝီတနီၤ ဟဲက့ၤကဒါက့ၤလၢဟံၣ် ဘၣ်ဆၣ် ဖိဒံဖိသၣ် သူၣ်က့သးပှၢ်တဖၣ် အိၣ်ဒံးဒၣ်လၢ တၢ်အိၣ်သဒၢအလီၢ် အါမးန့ၣ်လီၤ. ထံဖိကီၢ်ဖိ ဒူဖိသဝီဖိတဖၣ် ဟဲက့ၤတနီၤ ဘၣ်ဆၣ် ဘၣ်အိၣ်ခိးကွၢ်တၢ်လၢ တၢ်ပျံၤတၢ်ဖုး တၢ်ဘၣ်ယိၣ်ဘၣ်ဘှီ အဖၢမုၢ်န့ၣ်လီၤ.