Karen ID fear of Tamadaw

၂၀၂၁ နံၣ်, လါဖ့ၤဘြူၤအါရံၤ ၉ သီ, သူလ့ၤတၢ်ကစီၣ်
ခီဖျိဟီၣ်ကဝီၤပူၤ မီၤစိရိၤအသုးဒီး လီၢ်ကဝီၤ ကညီတၢ်ထူၣ်ဖျဲးသုးမုၢ်ဒိၣ် အသုးတဖၣ် တၢ်ဘၣ်သဂၢၢ်ခးလိၥ်သးအိၣ်ထီၣ်ဝဲအဖီခိၣ် ဟီၣ်ကဝီၤကမျၢၢ်လၢ အအိၣ်ဖဲ
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ဟီၣ်ကဝီၤတဖၣ် ဘၣ်ဃ့ၢ်အိၣ်ကဒုဆူ ခိခိၣ်ပှၢ်လၢ်ကျါ လၢအတၢ်ဘံၣ်တၢ်ဘၢ အဂီၢ်န့ၣ်လီၤ. ဒီး ဖဲ ၂၀၂၁ နံၣ် လါဖ့ၤဘြူၤအါရံၤ ၇ သီဂီၤခီ ၁၂း၃၀ နၣ်ရံၣ် ကတီၢ် ကမျၢၢ်ဃ့ၢ်အိၣ်ကဒုတဖၣ် ဘၣ်သုးကဒီးအသးဆူ တၢ်လီၢ်အဂၤတတီၤ ခီဖျိမီၤစိရိၤအသုးတဖၣ် ဟဲဘူးထီၣ်ဒီး အဝဲသ့ၣ်ဃ့ၢ်အိၣ်ကဒုအလီၢ် အဃိန့ၣ်လီၤ.
လီၢ်ကဝီၤကမျၢၢ် ဃ့ၢ်အိၣ်ကဒုအကျါတဂၤ လၢအမ့ၢ် စီၤထံဖီ စံးဝဲဒၣ်လၢ ပှၤဃ့ၢ်အိၣ်ကဒုတဖၣ် လၢတၢ်အီၣ်တၢ်အီဒီး တၢ်လိၣ်အကလုၥ်ကလုၥ်အဂီၢ် ဟးဃုအီၣ်ဃၥ်အီၣ်လၢ တၢ်ဃ့ၢ်အိၣ်ကဒု အလီၢ်အခိၣ်အဃၢၤ အဆၢကတီၢ် ဘၣ်သဂၢၢ်ဒီး မီၤစိရိၤအသုးတဖၣ် အဃိ မီၤစိရိၤအသုးတဖၣ် ခးအဝဲသ့ၣ်ဒီး ဘၣ်ဃ့ၢ်ပူၤပျဲးကွံၥ်ဝဲအသးန့ၣ်လီၤ. တကတီၢ်ဃီ မီၤစိရိၤအသုးတဖၣ် လဲၤနုၥ်စ့ၢ်ကီးလၢ ဃဲဒဲသဝီဒီး ဟးဃုတၢ်လၢ ဟံၣ်ပူၤဃီပူၤအိၣ်ဝဲဒၣ်စ့ၢ်ကီးန့ၣ်လီၤ. လၢတၢ်န့ၣ်အဃိ ကမျၢၢ်ဃ့ၢ်အိၣ်ကဒုတဖၣ် ကက့ၤဟံးအီၣ်ဘုသး, တၢ်အီၣ်တၢ်အီဒီး တၢ်လိၣ်အဂၤတဖၣ်အဂီၢ် က့ၤဝဲဒၣ်တဘူၣ်လၢၤဘၣ် အဂ့ၢ်န့ၣ် ဒူသဝီကရူၢ် ပှၤဘၣ်မူဘၣ်ဒါတဂၤ စံးဝဲဒၣ်န့ၣ်လီၤ.