Tee Moo Kee Villagers hope to go back to their village

လါယနူၤအါရံၤ ၂၉ သီ, ၂၀၂၁ နံၣ်
ဖဲလါယနူၤအါရံၤ ၂၉ သီ ၂၀၂၁ နံၣ်အနံၤ မုၢ်တြီၢ်ကီၢ်ရ့ၣ်, လူၤသီကီၢ်ဆၣ် စီၤမုၢ်ပျီကရူၢ်, ထံမူခံသဝီ ပှၤထူလံၤဖိတဖၣ် ပၥ်ဖှိၣ်ထီၣ်လိၥ်အသးဒီး မၤဝဲတၢ်သကွံၢ်ကညး လၢအကစၢ်ဒၣ်ဝဲ အတၢ်စူၣ်တၢ်နၥ် ဒ်သိးပယီၤသုးကလၢၤ အိၣ်လၢအဟီၣ်ကဝီၤပူၤတဖၣ် ကထုးကွံၥ်အသးန့ၣ်လီၤ.
တၢ်ရဲၣ်တၢ်ကျဲၤအဝဲအံၤ ဘၣ်တၢ်ရဲၣ်ကျဲၤဒုးအိၣ်ထီၣ်အီၤလၢ သဝီသူၣ်က့သးပှၢ်တဖၣ် ဒီးတၢၣ်ပီၣ်တဲသကိးဝဲဒီး သဝီဖိတဖၣ် ဒ်သိးတၢ်ရဲၣ်တၢ်ကျဲၤ ကကဲထီၣ်အဂီၢ် န့ၣ်လီၤ. ဘၣ်တၢ်ရဲၣ်ကျဲၤမၤအီၤဖဲ ထံမူခံသဝီလီၢ်လံၤ ဒီး ပှၤဟဲဝဲခဲလၢၥ် (၇၀) ဂၤဒီး မ့ၢ်စ့ၢ်ကီးဝဲ တၢ်အဆိကတၢၢ်တဝီ န့ၣ်လီၤ.
ဒ်သိး ဒုၣ်ဒါလၢပဟီၣ်ကဝီၤတဖၣ် ကထုးကွံၥ်အသးဒီး ပကဟဲက့ၤအိၣ်ဘၣ်လၢ ပကစၢ်အလီၢ်, ပကဖံးအီၣ်မၤအီၣ်ဘၣ်သဘျ့, လဲၤဘၣ်က့ၤဘၣ်ကသဘျ့အဂီၢ်န့ၣ် ပပၥ်ဖှိၣ်ထီၣ်လိၥ်သးဒီး ပမၤဝဲတၢ်ရဲၣ်တၢ်ကျဲၤအဝဲအံၤ န့ၣ်လီၤအဂ့ၢ်န့ၣ် စီၤအဲၣ်န့ၢ်မူ လၢအမ့ၢ် ထံမူခံသဝီဖိတဂၤ စဲးဝဲဒၣ်န့ၣ်လီၤ.