Local Civilian demostration in KNU Klwer Lwee Htu District (Karen and Burmese)

သူလ့ၤတၢ်ကစီၣ် (၆-၈-၂၀၂၀)
၂၀၂၀ နံၣ် လါအီကူးထီၣ် (၆) သီအနံၤ ကမျၢၢ်ဖိလၢ အိၣ်ဆိးလၢ ကီၢ်ရ့ၣ်ချၢၣ်လွံၢ်ထူၣ် ဆီထံးကီၢ်ဆၣ် ကရူၢ်သ့ၣ်တဖၣ် ဒ်အမ့ၢ် ထံဘျါကရူၢ်, စီၤသဲခံကရူၢ်, မဲၤကတံၤကရူၢ်, မဲၤယဲၥ်ခံကရူၢ်, ထံ၀ၣ်ဘှ့ခံကရူၢ်, ဘျီခိၣ်ကရူၢ် သ့ၣ်တဖၣ် ပၥ်ဖှိၣ်ထီၣ်အသး ကမျၢၢ်ဂံၢ်ဘါ ခဲလၢၥ်အိၣ်ဝဲ (၂၀၀) ဘျဲၣ် ဃၣ်ဃၣ်ဒီး ဟဲလီၤဝဲဆူ စလူၣ်ခၠီ ဒိၣ်စ့း တၢ်လီၢ်လၢ ပယီၤသုးကလၢၤအိၣ်အလီၢ် ဒီး ပိၥ်ထီၣ်ဝဲကျဲမုၢ်ခိၣ် ဒီး ကိးသတြီထီၣ်ဝဲ အတၢ်ဘၣ်သးန့ၣ်လီၤ.
ကမျၢၢ်ဖိ အတၢ်ဟူးတၢ်ဂဲၤဘျီဝဲအံၤ ဃ့ထီၣ်ဝဲတၢ်ဂ့ၢ် (၅) ထံၣ်ဒ်အမ့ၢ် (၁) တၢ်မၤသံ နီၢ်မုၥ်နီၤ ဒီး ပှၤအဂၤတဖၣ် တၢ်ကဟံအီၤဂ့ၢ်ဝီ ဖျိဖျိဖျါဖျါ (၂) ပယီၤသုး အတၢ်ထီၣ်ဒုးလၢ ကလုၥ်ဒူၣ်အဟီၣ်ကဝီၤပူၤဒီး မၤသံဝဲကလုၥ်ဒူၣ်ဖိတဖၣ် န့ၤဆိကတီၢ်ကွံၥ်အီၤတဘျီဃီ (၃) ကီၢ်ပယီၤပဒိၣ် ဒီး ကီၢ်ပယီၤသုးသ့ၣ်တဖၣ် မၤဘၣ်ဒိဝဲ ပှၤဂ့ၢ်ဝီခွဲးယၥ်န့ၤ တၢ်ကဟံအီၤဂ့ၢ်ဝီတဘျီဃီ (၄) ဒ်သိးကမျၢၢ်ဖိတဖၣ် ကပူၤပျဲးဒီး တၢ်ဘၣ်ယိၣ်သးပျံၤတဖၣ်အဂီၢ် ကီၢ်ပယီၤပဒိၣ် ကမၤဖျါထီၣ်ဝဲ ထံကီၢ်ဒီဘ့ၣ် တၢ်ပတုၥ်တၢ်ဒုးအလံၥ်ဃံးဃၥ် တၢ်အၢၣ်လီၤအီလီၤသ့ၣ်တဖၣ် တဘျီဃီ (၅) ကမျၢၢ်အတၢ်အိၣ်မူ တၢ်ဘံၣ်တၢ်ဘၢ ကအိၣ်အဂီၢ် ပယီၤသုးသ့ၣ်တဖၣ် ဟးထီၣ်ကွံၥ်လၢ ပဟီၣ်ကဝီၤပူၤတဘျီဃီ အဂ့ၢ်သ့ၣ်တဖၣ်န့ၣ်လီၤ.
ကီၢ်ပယီၤပဒိၣ် ဒီး ကီၢ်ပယီၤသုးသ့ၣ်တဖၣ် အမူအဒါအိၣ်ဝဲလၢ ကဘၣ်မၤဖျါထီၣ်ဝဲ ထံကီၢ်ဒီဘ့ၣ် တၢ်ပတုၥ်တၢ် အလံၥ်ဃံးဃၥ် တၢ်အၢၣ်လီၤအီလီၤသ့ၣ်တဖၣ်န့ၣ်လီၤ. တမၤဖျါထီၣ်ဝဲဘၣ် အမဲၥ်ညါ ထီဒါဝဲ ထံကီၢ်ဒီဘ့ၣ် တၢ်ပတုၥ်တၢ်ဒုး အလံၥ်ဃံးဃၥ် ဒီး မၤဘၣ်ဒိဝဲ ကမျၢၢ်ဖိအခွဲးအယၥ် မၤပျံၤမၤဖုးကမျၢၢ်ဖိ မၤသံမၤဝီကမျၢၢ်ဖိ လၢအတၢ်ကမၣ်တအိၣ်ဘၣ်သ့ၣ်တဖၣ် အဃိ ကမျၢၢ်ဖိသ့ၣ်တဖၣ် ဘၣ်ဂဲၤဆၢထၢၣ် ထီဒါဝဲ ပယီၤသုးအတၢ်မၤဒ်အံၤ သ့ၣ်တဖၣ်န့ၣ်လီၤ. ပယီၤသုး အတၢ်မၤထီဒါ ကမျၢၢ်ဖိ ခွဲးယၥ် မၤပျံၤမၤဖုး ကမျၢၢ်ဖိ မၤသံမၤဝီကမျၢၢ်ဖိ သ့ၣ်တဖၣ် မ့တပတုၥ်ကွံၥ်ဝဲဘၣ်ဒီး ပယီၤသုး ကလၢၤလၢ အိၣ်ဘူးဒီး ကမျၢၢ်ဖိ လၢအကဲထီၣ် တၢ်ကီတၢ်ခဲ တၢ်တံၥ်တၥ်လၢ ကမျၢၢ်ဖိအဂီၢ်တဖၣ် မ့တက့ၤလီၤဘၣ်န့ၤ ကမျၢၢ်ဖိသ့ၣ်တဖၣ် လၢအလီၢ်အကျဲ အသနၢၣ်ဒၣ်ဝဲ ကဂဲၤလိၥ်ဝဲဒီး ကပၥ်ဖျါထီၣ် အတၢ်ဘၣ်သးန့ၤ ကမျၢၢ်လၢအတီခိၣ်ရိၣ်မဲ တၢ်ရဲၣ်တၢ်ကျဲၤတဖၣ် စံးဘၣ်သူလ့ၤတၢ်ကစီၣ် န့ၣ်လီၤ.