Local civilian demostration regarding Naw Mu Naw case

ခီဖျိ ကီၢ်ပယီၤသုး ခးသံ နီၢ်မုၣ်နီၤ အဃိ လီၢ်ကဝီၤဒူသဝီဖိတဖၣ် ပၥ်ဖျါထီၣ် အတၢ်ဘၣ်သး
မုၢ်နံၤ ၂၂ သီ လါယူၤလံ ၂၀၂၀ နံၣ်

ဖဲ ၂၀၂၀ နံၣ် လါယူၤလံထီၣ် ၂၂ သီ အနံၤ ဂီၤခီ ၇ နၣ်ရံၣ် တုၤ ၁၁ နၣ်ရံၣ် အဆၢကတီၢ် ဒူသဝီကမျၢၢ်လၢ အိၣ်ဆိးဖဲ ဒွဲၣ်လိကီၢ်ဆၣ် မးလ့လၢၢ်, ဝီၢ်မုၢ်, မဲၤဝ့ၤ ဒီး ခူၣ်သူၣ်ထၣ် ကရူၢ်အပူၤသ့ၣ်တဖၣ် လဲၤပၥ်ဖျါထီၣ်အသးလၢ ကီၢ်ပယီၤသုးကလၢၤ (၄) ဖျၢၣ်အမဲၥ်ညါ လၢအမ့ၢ် မဲၤဝ့ၤသုးကလၢၤ, က့ၣ်ကိၥ်သုးကလၢၤ, ဝီၢ်မုၢ်သုးကလၢၤ ဒီး ခူၣ်သွံၣ်ထၣ် သုးကလၢၤသ့ၣ်တဖၣ် အမဲၥ်ညါန့ၣ်လီၤ. ဒူသဝီ ခဲလၢၥ် (၃၅) ဖျၢၣ် ဒီး ပှၤနီၣ်ဂံၢ်ခဲလၢၥ်အိၣ်ဝဲ (၁၅၂၄) ဂၤ လၢတၢ်လဲၤပၥ်ဖျါထီၣ်သး ဘျီဝဲအံၤန့ၣ်လီၤ.

လီၢ်ကဝီၤဒူသဝီကမျၢၢ်ဖိ အတၢ်ပၥ်ဖျါထီၣ်သးဘျီဝဲအံၤ အဂ့ၢ်အကျိၤန့ၣ် ခီဖျိလၢ ကီၢ်ပယီၤသုး စကခ (၈) စုဒုၣ်တီၤဖီလၥ် ခီၣ်ချ့သုးရ့ၣ် ခမရ (၄၀၉) အိၣ်တၢ်လီၢ်ဖဲ ခူၣ်သွံၣ်ထၣ် သုးကလၢၤ ဒီး ဘၣ်တၢ်တီခိၣ်ရိၣ်မဲအီၤလၢ သုးကလၢၤခိၣ် (ကၠီၣ်၀ၤနး) န့ၣ်လီၤ. ဖဲ ၁၆-၇-၂၀၂၀ နံၤ ဂီၤခီ ၆ နၣ်ရံၣ် အဆၢကတီၢ် ခူၣ်သွံၣ်ထၣ်သုးကလၢၤခိၣ် (ကၠီၣ်၀ၤနး) အပှၤသုးဖိ ၂ ဂၤ ဟးထီၣ်လၢ အသုးကလၢၤအချၢ ဒီး ဟဲလီၤဝဲလၢ ပိၢ်လိထၣ်သဝီပူၤ ဝံၤလဲၤတမျၥ် ဒီး ခးသံဝဲ ပိၢ်လိထၣ် သဝီဖိ နီၢ်မုၥ်နီၤ ရၢၢ်ရၢၢ်စၢၢ်စၢၢ် ဒီး ဟံန့ၢ်ဝဲ နီၢ်မုၥ်နီၤအဖဲထူတဘိ အနၢ်ဒံးတခိၣ် န့ၣ်လီၤ. တကးဒံးဘၣ် လၢတနံၣ်ညါအံၤအကတီၢ်ပူၤ ကီၢ်ပယီၤသုး လၢအမ့ၢ် စကခ (၈) အစုဒုၣ်တီၤဖီလၥ် သုးရ့ၣ်တဖၣ်စ့ၣ်ကီး ခးသံစ့ၣ်ကီးဝဲ ၀ၣ်သိခိၣ်သဝီဖိ, ခးသံစ့ၣ်ကီးဝဲ ဂၢၤပှၢ်ဖဲမဲၤဝ့ၤသဝီအကျဲမုၢ်ခိၣ်, ခးလီၤကျိဖးဒိၣ်လၢ ၀ၣ်သိခိၣ်အသဝီပူၤ, ခးသံဝဲကူဆ့းအသဝီဖိ, ခးသံစ့ၣ်ကီးဝဲ ၀ၣ်သိထၣ်သဝီဖိ တကးဒံးဘၣ် မၤပျံၤမၤဖုးစ့ၢ်ကီး လီၢ်ကဝီၤကမျၢၢ်ဖိ သ့ၣ်တဖၣ်အဃိ န့ၣ်လီၤ.

၂၀၂၀ နံၣ် လါယူၤလံ ၂၂ သီအနံၤ ကမျၢၢ်ဖိထီဒါပၥ်ဖျါဃ့ထီၣ် တၢ်ဂ့ၢ် (၆) ထံၣ် ဒ်အမ့ၢ် (၁)၂-၁-၂၀၂၀ နံၤ ပယီၤသုး စကခ (၈) ခမရ (၄၀၈) လဲၤခးသံ၀ၣ်သိခိၣ်သဝီဖိ (ပတသးမံ), (၂) ၅-၃-၂၀၂၀ နံၤ ပယီၤသုး ခမရ (၃၃၈) ခးသံပပှၤဂၢၤပှၢ် ဖဲမဲၤဝ့ၤသဝီအကျဲမုၢ်ခိၣ် (ပတသးမံ), (၃) ၇-၅-၂၀၂၀ နံၤ ပယီၤသုး စကခ (၈) ခမရ (၄၁၀) ခးလီၤကျိဖးဒိၣ်လၢ ၀ၣ်သိခိၣ်သဝီပူၤ (ပတသးမံ), (၄) ၉-၅-၂၀၂၀ နံၤ ပယီၤသုး စကခ (၈) ခမရ (၄၁၀) ခးသံကူဆ့းသဝီဖိ (ပတသးမံ), (၅) ၂-၆-၂၀၂၀ နံၤ ပယီၤသုး စကခ (၈) ခမရ (၄၀၅) ခးသံ ၀ၣ်သိထၣ်သဝီဖိ (ပတသးမံ), (၆) ၁၆-၇-၂၀၂၀ နံၤ ပယီၤသုး စကခ (၈) ခမရ (၄၀၉) လဲၤခးသံ ပိၣ်လိထၣ်သဝီဖိ (ပတသးမံ), တၢ်ဂ့ၢ်လၢလီၢ်ကဝီၤကမျၢၢ်ဖိ ထီဒါပၥ်ဖျါဃ့ထီၣ်ဝဲ (၆) ထံၣ်အံၤ ဘၣ်တၢ်လဲၤကျးလီၤအီၤလၢ ပယီၤသုးကလၢၤ (၄) ဖျၢၣ်အမဲၥ်ညါ န့ၣ်လီၤ.

လီၢ်ကဝီၤကမျၢၢ်ဖိသ့ၣ်တဖၣ် ဃ့ထီၣ်စ့ၣ်ကီးဝဲလၢ ကီၢ်ပယီၤသုးကလၢၤ ဒ်အမ့ၢ် ဝီၢ်မုၢ်သုးကလၢၤ, ခူၣ်သွံၣ်ထၣ် သုးကလၢၤ, က့ၣ်ကိၥ်သုးကလၢၤ, မဲၤဝ့ၤသုးကလၢၤသ့ၣ်တဖၣ် ကဘၣ်ဟးထီၣ်ကွံၥ်ဝဲဒၣ် န့ၣ်လီၤ. ခီဖျိလၢ သုးကလၢၤသ့ၣ်တဖၣ်အံၤ အိၣ်အဃိ ကဲထီၣ်ဝဲ တၢ်ကီၢ်တၢ်ခဲလၢ ဒူဖိသဝီဖိအဂီၢ် တကးဒံးဘၣ် ကဲထီၣ်တၢ်လီၤပျံၤလီၤဘၣ်ယိၣ်လၢ ဒူသဝီဖိသ့ၣ်တဖၣ် အဂီၢ်န့ၣ်လီၤ.

လီၢ်ကဝီၤကမျၢၢ်ဖိတဖၣ် အတၢ်ဃ့ထီၣ်လၢ ကီၢ်ပယီၤသုးကလၢၤ (၄) ဖျၢၣ်အံၤ ကဘၣ်ဟးထီၣ်ကွံၥ်ဝဲန့ၣ် မ့ၢ်တၢ်ဃ့ထီၣ်လၢ အတီအတြၢ် ဒီး ဖိးမံစ့ၣ်ကီးဒီး ထံကီၢ်ဒီဘ့ၣ် တၢ်ပတုၥ်တၢ်ခး အလံၥ်ဃံးဃၥ်အဃိ ကညီကလုၥ်ကိးဂၤဒဲး မ်ပကပၥ်သူၣ်ပၥ်သး ဒီး ဟူးဂဲၤလၢ ပလီၢ်ပကျဲ ပသနၢၣ်ဒၣ်ဝဲ လၢတၢ်ဆီၣ်တခူထီၣ် လီၢ်ကဝီၤကမျၢၢ် အတၢ်ဃ့ထီၣ်အံၤန့ၣ် မ့ၢ်ကညီဒီကလုၥ်စၢဖှိၣ်ကရၢ အတၢ်ဘိးဘၣ်သ့ၣ်ညါဆူ ကညီကလုၥ်ခဲလၢၥ် န့ၣ်လီၤ.