သုးမီၤစိရိၤ ဟံးဆူၣ်ထံကီၢ်တၢ်စိတၢ်ကမီၤ အပၢၤကီၢ်သုးတဖၣ် သူဝဲအတၢ်စိတၢ်ကမီၤ ဒီး မၢဆူၣ်ဝဲ သဝီဖိတဖၣ် တ့ထီၣ်န့ၢ်ဂၢၤ လၢအသုးကလၢၤအဂီၢ်

လါစဲးပထ့ဘၢၣ် ၆ သီ, ၂၀၂၁ နံၣ်, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ်, ဘီကထၣ်ကရူၢ်, ကိမၠ့ၣ် သဝီဖိတဖၣ် သုးမီၤစိရိၤ ဟံးဆူၣ်ထံကီၢ် တၢ်စိတၢ်ကမီၤ အပၢၤကီၢ်သုးတဖၣ် မၢန့ၢ်ဆူၣ်ဝဲ သဝီဖိတဖၣ် လၢကတ့ထီၣ်န့ၢ် ဂၢၤလၢအသုးကလၢၤအဂီၢ် ဖဲ လါစဲးပထ့ဘၢၣ် ၄ သီ ဒီး ၅ သီ အနံၤအဂ့ၢ်န့ၣ် လီၢ်ကဝီၤဖိတဂၤ ပၥ်ဖျါဝဲဒၣ်န့ၣ်လီၤ.

ဖဲ လါစဲးပထ့ဘၢၣ် ၄ သီအနံၤန့ၣ် ပၢၤကီၢ်သုး လၢအအိၣ်ဖဲ ကိမၠ့ၣ်သၤယၤ သဝီပူၤတဖၣ် အပၢၤကီၢ်ခိၣ် လၢအမ့ၢ် စ့ၤဟ့ထိၣ်, တီခိၣ်ရိၣ်မဲ ဒီး မၢ်ဆူၣ်ဝဲ သဝီဖိလၢ အအိၣ်ဘူးဒီး ပၢၤကီၢ်သုးကလၢၤတဖၣ် လၢကဂၢၤန့ၣ် အသုးကလၢၤ လၢထးဆှုၣ်န့ၣ်လီၤ.

ဒီးဖဲ လါစဲးပထ့ဘၢၣ် ၅ သီအနံၤန့ၣ် မၢဝဲသဝီဖိတဖၣ် ထုးလီၤက့ၤ ထးဆှုၣ်တဖၣ်န့ၣ် ဒီး မၢအဂၢၤက့ၤ သုးကလၢၤအံၤလၢ (အုတ်) အသီတဘျီ အဂ့ၢ်န့ၣ် သ့ၣ်ညါဘၣ်လၢ သဝီဖိတဂၤ အအိၣ်န့ၣ်လီၤ.

တကီၢ်ခါတၢ်အိၣ်သးခဲအံၤ ခီဖျိ ခိဝံး-၁၉ တၢ်ဆါအံၤ ဘၣ်ကူဘၣ်ဂၥ်တၢ် အဆၢကတီၢ်အဃိ ဒူဖိသဝီဖိတဖၣ် ဘၣ်ယိၢ်ဘၣ်ဘှီတၢ် န့ၣ်လီၤ. လၢတၢ်န့ၣ်အဃိ သုးမီၤစိရိၤ အပၢၤကီၢ်သုးတဖၣ် မၢဆူၣ်ဝဲသဝီဖိဒ်အံၤန့ၣ် မ့ၢ်တၢ်လီၤဘၣ်ယိၢ်လၢ သဝီဖိတဖၣ် အသးသမူအဂီၢ် ဒီး မ့ၢ်စ့ၢ်ကီးတၢ်မၤဘၣ်ဒိ ပှၤကညီဂ့ၢ်ဝီခွဲးယၥ်လီၤ အဂ့ၢ်န့ၣ် သဝီဖိလၢ တအဲၣ်ဒိးပၥ်ဖျါအမံၤတဂၤ စံးဝဲဒၣ်န့ၣ်လီၤ.