BGF ဒီး ပယီၤသုးအတၢ်ဟူးတၢ်ဂဲၤ တကီၢ်ခါ ဖဲမုၢ်တြီၢ်ကီၢ်ရ့ၣ်, သုးက့ ၅ ဟီၣ်ကဝီၤပူၤ

လါမ့ၤ ၁၄ သီ, ၂၀၂၁ နံၣ် အနံၤ (BGF) သုးတဖၣ် ဟဲထီၣ်ဟူးဂဲၤအါထီၣ်လၢ မုၢ်တြီၢ်ကီၢ်ရ့ၣ်, သုးက့ ၅ ဟီၣ်ကဝီၤပူၤ ဒ်သုးရ့ၣ်တဖၣ် လၢအမ့ၢ် ၁၀၁၃, ၁၀၁၄, ၁၀၁၁, ၁၀၁၈, ၁၀၁၉ အပှၤနီၣ်ဂံၢ် ခဲလၢၥ်ကအိၣ် ၅၀၀ ဃၣ်ဃၣ်န့ၣ်လီၤ.
တၢ်သ့ၣ်ညါဘၣ်ကဒီး ဖဲလါမ့ၤထီၣ် ၁၃ သီ, ၂၀၂၁ နံၣ် အနံၤ (BGF) သုးတဖၣ် ဟူးဂဲၤအါထီၣ်လၢ ကမးမိၢ်ပူၤ ဒီး လူၤသံကွၢ်သံဒိးတၢ်လၢ ကမျၢၢ်ထံဖိကီၢ်ဖိအကျါ အါထီၣ်ဒီး ကဲထီၣ်တၢ်ပျံၤတၢ်ဖုးလၢ ကမျၢၢ်ထံဖိကီၢ်ဖိတဖၣ်အဂီၢ်န့ၣ် လီၢ်ကဝီၤဖိ လၢတအဲၣ်ဒိးပၥ်ဖျါအမံၤတဂၤ စံးဝဲဒၣ်န့ၣ်လီၤ. "ခီဖျိ (BGF) သုးတဖၣ် ဟဲအါထီၣ် ဒီး သံကွၢ်သံဒိးတၢ်လၢ ပအိၣ်အဃိ ကဲထီၣ်တၢ်ပျံၤတၢ်ဖုးလၢ ပဝဲလီၢ်ကဝီၤဖိသ့ၣ်တဖၣ်အဂီၢ် ဒိၣ်မးန့ၣ်လီၤ. အဝဲသ့ၣ် မ့ၢ်ဆဲးမၤဝဲ တၢ်ဟူးတၢ်ဂဲၤ ဒ်သိးအံၤ ခါဆူညါဒု ကကဲထီၣ်တၢ်ကီတၢ်ခဲလၢ ပတၢ်လုၢ်အီၣ်သးသမူ ဒ်အမ့ၢ် တၢ်ထူစံၣ်မၤဝဲၤ ဒီး တၢ်ဖဲးခုးကျီနီၣ် အဂီၢ်လီၤ"
မၤကဒီးဖဲ တနံၤအံၤ လါမ့ၤ ၁၄ သီ, ၂၀၂၁ နံၣ် ဖဲ ၀၉း၀၀ ဆၢကတီၢ် ပယီၤသုးကလၢၤ လၢအအိၣ်ဆီလီၤအသးဖဲ ဖါဂီၤလိ သုးကလၢၤ, စီၤမုၢ်ပျီကရူၢ်, လူၤသီကီၢ်ဆၣ် မုၢ်တြီၢ်ကီၢ်ရ့ၣ် ဟီၣ်ကဝီၤပူၤတဖၣ် ခးလီၤစိဝဲ သဝီဖိတဖၣ် ဖဲအလဲၤဃုအီၣ်ဃၣ်အီၣ်တၢ် ဖဲကွီၢ်မုၢ်သံပျီ အဆၢကတီၢ် ခးလီၤဝဲကျိးဖးဒိၣ် ၃ ဖျၢၣ်န့ၣ်လီၤ.
သဝီဖိလၢအလဲၤဃုအီၣ်တၢ် အကျါတဂၤ လၢအမ့ၢ် စီၤဖါတကံ စံးဝဲ "ပယီၤခးလီၤကျိဖးဒိၣ် ဒ်သိးအံၤအဃိ ပပျံၤတၢ်ဖုးတၢ်ဒိၣ်မး ဒီး ပဆဲးဃုအီၣ်တၢ် တဘူၣ်လၢၤဘၣ် အဃိ ပက့ၤစံၣ်ကွံၥ်ဆူ ပတၢ်လီၢ်တဘျီဃီလီၤ"
စးထီၣ်လၢ ပယီၤသုးမီၤစိရိၤ ကီၣ်ကး ထီၣ်ဟံးန့ၢ်ဆူၣ် တၢ်စိတၢ်ကမီၤဝံၤအလီၢ်ခံ ပယီၤသုးတဖၣ် ဟူးဂဲၤအါထီၣ်လၢ မုၢ်တြီၢ်ကီၢ်ရ့ၣ် ဟီၣ်ကဝီၤပူၤ အဖီခိၣ် မၤဘၣ်ဒိစ့ၢ်ကီး ပှၤဂ့ၢ်ဝီခွဲးယၥ် ကိးနံၤဒဲးဃၣ်ဃၣ်န့ၣ် ပှၤလီၢ်ကဝီၤဖိတဖၣ် စံးဝဲဒၣ်န့ၣ်လီၤ.