ပယီၤသုး ခးနါစိၤတၢ်လၢကဘီယူၤ ဒီး ကမျၢၢ်ဖိဘၣ် ဃ့ၢ်မှံဟးဖျိး

ပယီၤသုး ခးနါစိၤတၢ်လၢကဘီယူၤ ဒီး ကမျၢၢ်ဖိဘၣ် ဃ့ၢ်မှံဟးဖျိး
ဖဲ လါအ့ဖြ့ၣ် ၂၇ သီ ၂၀၂၁ နံၣ် အနံၤ မုၢ်တြီၢ်ကီၢ်ရ့ၣ် ဘုသိၣ်ကီၢ်ဆၣ် ခီပူးကရူၢ် ဒီး ဘုအါဒၢကရူၢ် တၢ်ဆၢထံး ဖဲဖီထၣ်သဝီခံလီၤ ဖုမဲစံၥ်ပျီပူၤ ပယီၤသုး ဟဲခးလီၤတၢ်လၢ ကဘီယူၤအဃိ ကမျၢၢ်ထံဖိကီၢ်ဖိသ့ၣ်တဖၣ် ဘၣ်ဃ့ၢ်အိၣ်သဒၢအသးဆူ မံၤခိၣ်ပှၢ်ကျါ ဘၣ်ပျံၤဘၣ်ဖုးတၢ် ဒိၣ်ဒိၣ်မုၢ်မုၢ် န့ၣ်လီၤ.
ပယီၤသုးခးလီၤတၢ်လၢ ကျိဖးဒိၣ် တကးဒံးဘၣ် အမဲၥ်ညါ ဟဲခးဃုၥ်တၢ်လၢ ကဘီယူၤအဃိ ကမျၢၢ်ထံဖိကီၢ်ဖိသ့ၣ်တဖၣ် အိၣ်ဒီးတၢ်ပျံၤတၢ်ဖုး တၢ်ဘၣ်ယိၣ်သးအုး တကးဒံးဘၣ်အမဲၥ်ညါ ဘၣ်ဃ့ၢ်အိၣ်သဒၢအသးဆူ တၢ်လူၢ်တၢ်တြီၤ လၢၢ်ကဆူးလ့ကဆူး အဃိ ကဲထီၣ်က့ၤတၢ်ကီတၢ်ခဲလၢ အဝဲသ့ၣ်ကဖံးအီၣ်မၤအီၣ်လၢ တၢ်လုၢ်အီၣ်နီၢ်ခိ သးသမူန့ၣ်လီၤ. တနီၤပထံၣ်ဘၣ်လၢ ဘၣ်ကွၢ်ဆၢၣ်မဲၥ်ဒီး တၢ်ကီတၢ်ခဲ တနီၤအိၣ်ဒီးဟုသး ဒၢပှၢ်ထီၣ်ဝဲ တနီၤဖိဆံးအိၣ်န့ၢ် ၂ သီအဃိ ခီဖျိတၢ်စူၤလီၤဆၢကတီၢ်အဃိ ကဲထီၣ်တၢ်ကီတၢ်ခဲ လၢမိၢ်ဖိဆံးသ့ၣ်တဖၣ် အဂီၢ်န့ၣ်လီၤ. သူၣ်က့သးပှၢ် ဒီး ဖိဒံဖိသၣ်တနီၤ ဘၣ်ကွၢ်ဆၢၣ်မဲၥ်ဒီး တၢ်ဆူးတၢ်ဆါ ဒ်အမ့ၢ် တၢ်လိၤကိၢ်, တၢ်ကူး, တၢ်ညၣ်ဂိၢ်, တၢ်ဘၣ်တမုၣ်, တၢ်စုတကံခီၣ်တကံ, ခီၣ်ကမဲၥ်ဆါ သ့ၣ်တဖၣ်န့ၣ်လီၤ. ဆၢကတီၢ်ဘၣ်လၢ ဘၣ်လဲၤက့ၤဖံးမၤ လၢခူးလၢသံၣ်, လၢစံၥ်ပျီပူၤ ဘၣ်ဆၣ် လဲၤက့ၤဖံးမၤ တဘူၣ်လၢၤဘၣ်အဃိ ကဲထီၣ်က့ၤ တၢ်ကီတၢ်ခဲလၢ အဝဲသ့ၣ်တဖၣ်အဂီၢ် န့ၣ်လီၤ.
စးထီၣ်ဖဲ လါမးရှး ၂၇ သီ ဒီး တုၤခဲအံၤ ပယီၤသုးမၤအၢမၤသီ ထံဖိကီၢ်ဖိ လၢကျိဖးဒိၣ် ဃုၥ်ဒီး ကဘီယူၤ လၢဟီၣ်ကဝီၤတၢ်လီၢ်အါတီၤအဃိ ကမျၢၢ်သ့ၣ်တဖၣ် ဘၣ်ပျံၤဘၣ်ဖုးတၢ် ပယီၤသုး မ့ၢ်ဆဲးဟူးဂဲၤဒံးဒ်အံၤန့ၣ် ကမျၢၢ်တဖၣ် လဲၤက့ၤဖံးမၤတၢ် တသ့လၢၤဘၣ်အဃိ ကဲထီၣ်က့ၤ တၢ်ကီတၢ်ခဲလၢ ကဖံးအီၣ်မၤအီၣ်လၢ ခါဆူညါအဂီၢ် န့ၣ်လီၤ.