မုၢ်တြီၢ်ကီၢ်ရ့ၣ် အတၢ်ဘၣ်ကွၢ်ဆၢၣ်မဲၣ်ဒီး ဒုၣ်ဒါ အတၢ်မၤအၢစးထီၣ် (၂၇.၃.၂၀၂၁ တုၤ ၃၀.၄.၂၀၂၁) နံၤ.

စးထီၣ်ဖဲ လါမးရှၣ် ၂၇. ၂၀၂၁ အနံၤဟါ ၃း၃၀ ဆၢကတီၢ် ဒုၣ်ဒါအကဘီယူၤ ဟဲဆှၣ်ဝဲ ပမုၢ်တြီၢ်ကီၢ်ရ့ၣ် သုးက့ဝဲၤလီၢ်ခိၣ်သ့ၣ် ဒီး ဖဲမုၢ်ခံးလီၤ ၇း၃၀ ဆၢကတီၢ် ဒုၣ်ဒါတဖၣ် စးထီၣ်ဟဲခးလီၤဝဲ ပမုၢ်တြီၢ်ကီၢ်ရ့ၣ် သုးက့ (၅) လၢကဘီယူၤ ဒုးသုးန့ၣ်လီၤ.
    ပသ့ၣ်ညါဘၣ်လၢ ဒုၣ်ဒါပယီၤသုးတဖုအံၤ ဟဲခးလီၤဝဲတၢ်လၢ မုၢ်တြီၢ်ကီၢ်ရ့ၣ်အပူၤ စးထီၣ်လၢ လါမးရှၣ် တုၤခဲအံၤ တပတုၥ်ကွံၥ်ဒံးဝဲဘၣ်. ကဘီယူၤဒုးသုး အတၢ်ဟဲခးလီၤဘျီဝဲအံၤ စးထီၣ်လၢ ဟဲခးလီၤဝဲ ဒီး တုၤလၢခဲအံၤ ပသ့ၣ်ညါဘၣ်လၢ ခးလီၤဝဲတၢ်လီၢ် (၁၃) တီၤ ဒီး ခးဝဲ (၂၁) ဘျီန့ၣ်လီၤ. ကဘီယူၤဒုးသုး အတၢ်ဟဲခးလီၤတၢ်အဖီခိၣ် တၢ်သံတၢ်ပှၢ် တၢ်ဘၣ်ဒိဘၣ်ထံး ဒီး တၢ်ဟးဂုၤဟးဂီၤ အိၣ်ထီၣ်စ့ၢ်ကီးဝဲဒၣ်န့ၣ်လီၤ. ပသ့ၣ်ညါဘၣ်လၢ ကဘီယူၤ အတၢ်ခးလီၤလၢ ကတီၢ်ယံၥ်ဘျီဝဲအံၤ ပှၤသံခဲလၢၥ်အိၣ်ဝဲ (၇) ဂၤဒီး ဘၣ်ဒိၣ်ခဲလၢၥ်အိၣ်ဝဲ (၁၉) ဂၤန့ၣ်လီၤ. မ့မ့ၢ်တၢ်ဟးဂုၤဟးဂီၤအဂၤတခီ မ့ၢ်ဝဲ ဟံၣ်အူအီၣ် ဒီး ဟးဂီၤခဲလၢၥ် (၁၂) ဖျၢၣ်, တီၤထီကၠိ (၂) ဖျၢၣ် လၢမ့ၢ်ဝဲ နီၣ်ဂံၢ် (၁) ပဒိၣ်တီၤထီကၠိ ဒီး ဒီၣ်ကူၤထၣ် တီၤထီကၠိ, ဘၣ်ဃုၥ်ဝဲဒီးဘုဖီ (၄) ဖျၢၣ် န့ၣ်လီၤ. ကဘီယူၤဒုးသုး ဟဲခးလီၤတၢ်ဘျီဝဲအံၤ စးထီၣ်လၢ ဟဲခးလီၤဝဲ ဒီး တုၤခဲအံၤ ကဘီယူၤ ဒီး ကဘီယူၤဖိ (Drone) တဖၣ် ဟဲဆှၣ်ဝဲတၢ် ခဲအံၤခဲအံၤန့ၣ်လီၤ.
    သုးမီၢ်စိရိၤ အတၢ်မၤအၢဝဲ ပပှၤကညီဖိတဖုအံၤ တမ့ၢ်ထဲလၢ ဟဲခးလီၤတၢ်လၢ ကဘီယူၤဘၣ်. မ့မ့ၢ်တခီ အသုးကလၢၤ လၢဟဲအိၣ်ဆီလီၤတ့ၢ်အသး လၢမုၢ်တြီၢ်ကီၢ်ရ့ၣ်အဟီၣ်ကဝီၤပူၤ သ့ၣ်တဖၣ်စ့ၢ်ကီး ခးလီၤဝဲကျိဖးဒိၣ် လၢဒူပူၤသဝီပူၤ ဒီး ကမျၢၢ်တၢ်ဖံးအီၣ်မၤအီၣ်လီၢ် အိၣ်စ့ၢ်ကီးဝဲ အါအါဂီၢ်ဂီၢ်န့ၣ်လီၤ. ပမၤလီၢ်တံၢ်က့ၤ ဒုၣ်ဒါသုး ဒ်အမ့ၢ် (ခမရ-၄၀၁, ၄၀၂, ၄၀၇, ၄၀၉, ၄၁၀, ၄၃၄, ၄၀၅ / စကခ-၈) အိၣ်လၢအသုးကလၢၤ, ဒီးခးလီၤကျိဖးဒိၣ်ခဲလၢၥ် အိၣ်ဝဲ (၁၀၆) ဖျၢၣ်ဒီး ဘၣ်သံဝဲ သဝီဖိခံဂၤ လၢအမ့ၢ်ဝဲ စီၤကၠံၣ်ဘု သးနံၣ်အိၣ်ဝဲ (၅၅) နံၣ် ဒီး နီၢ်မုၥ်ထိၣ် သးနံၣ် (၄၉) နံၣ် မ့မ့ၢ်ပှၤဘၣ်ဒိတခီ အိၣ်ဝဲ (၆) ဂၤန့ၣ်လီၤ. မ့မ့ၢ်ခးသံဝဲလၢအနီၢ်ကစၢ်တခီ အိၣ်စ့ၢ်ကီးဝဲ ခံဂၤလၢအမ့ၢ် စီၤဖါဆံး သးနံၣ် အိၣ် (၃၂) နံၣ်, စီၤမဲၣ်ပး သးနံၣ် (၃၅) နံၣ်န့ၣ်လီၤ. စီၤမဲၣ်ပးတဂၤ ဖဲခးသံဝဲဆၢကတီၢ် ပၥ်ဃုၥ်ဝဲ သိလ့ၣ်ယီၢ်ဖိတခိၣ် ဒီးစ့ (၁,၀၀၀,၀၀၀) ကၠးန့ၣ်လီၤ.   
    တကးဒံးဘၣ် အမဲၥ်ညါ ပသ့ၣ်ညါဘၣ်စ့ၢ်ကီးလၢ ပယီၤသုး (ခမရ-၄၀၂, ၄၀၇, ၄၀၉, ၄၁၀ /-စကခ-၈) ဒီး (BGF-၁၀၁၄, ၁၀၁၃, ၁၀၁၂) လၢအဟူးဂဲၤဝဲလၢ မုၢ်တြီၢ်ကီၢ်ရ့ၣ်ပူၤသ့ၣ်တဖၣ် ဟးဖီၣ်န့ၢ်ဆူၣ် ဒီး ဟံန့ၢ်ဆူၣ်ဝဲ သဝီဖိတၢ်ဖိတၢ်လံၤ အိၣ်ဝဲဒၣ်န့ၣ်လီၤ. ပသ့ၣ်ညါဘၣ်လၢ ဒုၣ်ဒါအတၢ်ဂိၥ်စုဂိၥ်ခီၣ်လၢ တလါကတီၢ်ပူၤအံၤ ဖီၣ်ဝဲသဝီဖိ ခဲလၢၥ် (၃၁) ဂၤ ဒီး ဟံန့ၢ်ဆူၣ်စ့ၢ်ကီးဝဲ တၢ်ဖိတၢ်လံၤ ဒ်အမ့ၢ် စ့, လီၤလၢခဲလၢၥ် (၂,၇၀၀,၀၀၀) ကၠး, ဟုသး ခဲလၢၥ် (၂၉) ထၢၣ်, သိအီၣ်, တၢ်ဖီဆၢကမူၥ်, မိၥ်ဂံၥ်, တၢ်ဆၢထံ, မၥ်အံး, ဃဲၣ်, ကါသိတပံၣ်ပၥ်, ကါတီၣ်လၢၢ် (၁) ခိၣ်, စဲးကူၥ်သ့ၣ် (၁) ဖျၢၣ်, စဲးထုးထံ (၁) ဖျၢၣ်, (Battery-၆) ဖျၢၣ်, (Solar-၅) ဘ့ၣ်, ဒၢ်လၢ်ပး (၄) ဘ့ၣ် ဒီး အဂုၥ်အဂၤန့ၣ်လီၤ. ဖဲအဝဲသ့ၣ် ဟးလူၤဟံဝဲ သဝီဖိတၢ်ဖိတၢ်လံၤ ဆၢကတီၢ် ဖီၣ်အီၣ်စ့ၢ်ကီးဝဲ ပှၤသဝီဖိ အထီးအဆီ တနီၤန့ၣ်လီၤ.