ခ့ၣ်အၣ်ယူၣ်-ကညီဒီကလုၥ်စၢဖှိၣ်ကရၢ, ဘျံးဒဝဲၢ်ကီၢ်ရ့ၣ်, သုးက့ ၄ တၢ်ပၢဟီၣ်ကဝီၤပူၤ တၢ်ဒုးကဲထီၣ်အဂ့ၢ်

၂၀၂၁ နံၣ် လါစဲးပထ့ဘၢၣ် ၇ သီ, ခ့ၣ်အဲၣ်ယူၣ်-လီၢ်ခၢၣ်သး
ဖဲ ၂၀၂၁ နံၣ် လါစဲးပထ့ဘၢၣ် ၆ သီအနံၤန့ၣ် သုးမီၤစိရိၤ အသုး လၢအအိၣ်ဆီလီၤအသး ဘူးဒီး ဒဝဲၢ်ဝ့ၢ်တဖၣ် ဟးထီၣ်ဝဲဒီးကါ (၂၀) ခိၣ် ဒီး လဲၤဝဲဒၣ်ဆူ ပလီကီၢ်ဆၣ် တကပၤန့ၣ်လီၤ. ဒီးမုၢ်ဟါလီၤအဆၢကတီၢ်န့ၣ် သုးတဖုအံၤ နုၥ်လီၤဝဲဒၣ်လၢ (ဒူးရင်းပင်ရှေၥင်) သဝီန့ၣ်လီၤ.
ဒီး ဖဲမုၢ်ဆ့ၣ်ထီၣ်တနံၤ လါစဲးပထ့ဘၢၣ်ထီၣ် (၇) သီဂီၤခီ ၈ နၣ်ရံၣ်အဆၢကတီၢ်န့ၣ် မီၤစိရိၤအသုးတဖုအံၤ ဘၣ်သဂၢၢ်ခးလိၥ်အသးဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, သုးက့ ၄, သုးရ့ၣ် (၇), သုးဒ့ ၂ အသုးသ့ၣ်တဖၣ် ဖဲ (ဒူးရင်းပင်ရှေၥင်) သဝီဒီး (ပိနဲတီၤ) သဝီ အဘၢၣ်စၢၤန့ၣ်လီၤ. တၢ်ဘၣ်သဂၢၢ်ခးလိၥ်အသး ကဲထီၣ်ဝဲ ၂ ဘျီ ဖဲတၢ်လီၢ်အဝဲန့ၣ်အဂ့ၢ် သ့ၣ်ညါဘၣ်န့ၣ်လီၤ.
တၢ်ခးလိၥ်သးကဲထီၣ်ဒ်အံၤ မ့ၢ်လၢမီၤစိရိၤအသုးတဖၣ် လဲၤကပၥ်ဝဲ တၢ်လီၢ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ပၥ်ပနီၣ် တၢ်လီၢ်လၢ အဝဲသ့ၣ် လဲၤဝဲတသ့ဘၣ် အဃိန့ၣ်လီၤ. တၢ်ခးလိၥ်သးကဲထီၣ်အဖီခိၣ် တၢ်ဘၣ်ဒိဘၣ်ထံး အိၣ်ဒ်လဲၣ်န့ၣ် တသ့ၣ်ညါဒံးဘၣ်န့ၣ်လီၤ.
ဒ်န့ၣ်အသိး ဖဲ ၂၀၂၁ နံၣ် လါစဲးပထ့ဘၢၣ် ၇ သီဂီၤခီ (၉း၂၀) နၣ်ရံၣ်အဆၢကတီၢ်စ့ၢ်ကီး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဘျံးဒဝဲၢ်ကီၢ်ရ့ၣ်, ကစၢၢ်ဒိၣ်ကီၢ်ဆၣ် ဟီၣ်ကဝီၤပူၤ (သဲခၠီကၠံကရူၢ်), (ယ့ၤပူၤ) သဝီအကပၤန့ၣ် တၢ်ခးလိၥ်သးကဲထီၣ်ဝဲတဘျီ လၢသုးမီၤစိရိၤအသုး သုးရ့ၣ် (၄၀၅), (၄၀၃) ဒီး လီၢ်ကဝီၤတၢ်ဒီသဒၢအသုးတဖၣ် အဘၢၣ်စၢၤန့ၣ်လီၤ. တၢ်န့ၣ်ဝံၤအလီၢ်ခံ ဖဲဟါလီၤခီ ၄ နၣ်ရံၣ်အဆၢကတီၢ်န့ၣ် တၢ်ဒုးကဲထီၣ်ကဒီး ၂ ဘျီတဘျီ ဖဲ (ယ့ၤပၠၤ) သဝီန့ၣ်လီၤ. တၢ်ဒုးကဲထီၣ် ၂ ဘျီ ဝံၤအလီၢ်ခံ သုးမီၤစိရိၤအသုးတဖၣ် ဆှၢအါထီၣ်အသုးဂံၢ်ဘါ အါအါဂီၢ်ဂီၢ်အဂ့ၢ်န့ၣ် လီၢ်ကဝီၤဘၣ်မူဘၣ်ဒါတဖၣ် ပၥ်ဖျါဝဲန့ၣ်လီၤ.
သဝီ လၢအအိၣ်ဘူးဒီး တၢ်ဒုးကဲထီၣ်အလီၢ် ဒ်အမ့ၢ် (ယ့ၤပူၤ), (ယ့ၤပၠၤ), (ကယ့ၤတီၤပၠီၣ်), (မဲၤကဲ) ဒီး (အဲၤဝဲ) သဝီ ၅ ဖျၢၣ်အံၤ သဝီဖိတဖၣ် ပျံၤတၢ်ဖုးတၢ်အဃိ တနီၤဃ့ၢ်ထီၣ်ကွံၥ်လၢ သဝီပူၤဒီး ဃုန့ၢ်တၢ်အိၣ်သဒၢအလီၢ် အိၣ်ဝဲလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဘျံးဒဝဲၢ်ကီၢ်ရ့ၣ်, ကစၢၢ်ဒိၣ်ကီၢ်ဆၣ် ဟီၣ်ကဝီၤပူၤ ခီဖျိ သုးမီၤစိရိၤအသုးတဖၣ် ဟဲနုၥ်လီၤဝဲလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤပူၤအဃိ တၢ်ခးလိၥ်သး ကဲထီၣ်ဝဲဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် အိၣ်ထီၣ်ဝဲဒၣ်န့ၣ်လီၤ.