သုးမီၤစိရိၤ ဟံးဆူၣ်ထံကီၢ်တၢ်စိတၢ်ကမီၤအသုးတဖၣ် ဖီၣ်ဝဲ ကမျၢၢ် လၢတၢ်ဂ့ၢ်တၢ်ကျိၤ တအိၣ်နီတမံၤဘၣ် တဂၤ ဖဲ ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် နၣ်သၤကွ့ကရူၢ်တၢ်ပၢဟီၣ်ကဝီၤပူၤ အဂ့ၢ်

လါစဲးပထ့ဘၢၣ် ၆ သီ, ၂၀၂၁ နံၣ်, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ်, နၣ်သၤကွ့ ဒူသဝီကရူၢ် တၢ်ပၢဟီၣ်ကဝီၤပူၤ သုးမီၤစိရိၤအသုး (စကစ) သုးတဖၣ် ဖီၣ်ဝဲသဝီဖိတဂၤ ဖဲလါစဲးပထ့ဘၢၣ် ၅ သီ ဟါခီ ၈ နၣ်ရံၣ် ၃၀ မံးနံး အဆၢကတီၢ်န့ၣ်လီၤ.
ဖဲ လါစဲးပထ့ဘၢၣ် ၅ သီဟါခီ ၈ နၣ်ရံၣ် ၃၀ မံးနံး အဆၢကတီၢ် သုးမီၤစိရိၤ ဟံးဆူၣ်ထံကီၢ်တၢ်စိတၢ်ကမီၤအသုး (စကစ) အသုးတဖၣ် ပၥ်ဖှိၣ်ထီၣ်အသးဒီး နၣ်သၤကွ့ သဝီသးပှၢ် အူသါလွ့ၤ (ပှၤလၢအအိၣ်ပှိၤ သုးမီၤစိရိၤအသုးတဂၤ) လဲၤဝဲဒၣ်လၢ စီၤတၢ်မျၢ်ဂီၤ (ကိး) စ့ၤမ့ထိ အဟံၣ် လၢအအိၣ်ဖဲ ကဝီၤဒ့ ၆ န့ၣ်ဒီး ဖီၣ်ဝဲ စီၤတၢ်မျၢ်ဂီၤန့ၣ်လီၤ. သုးမီၤစိရိၤ အသုးတဖၣ် ဖီၣ်ဝဲ စီၤတၢ်မျၢ်ဂီၤ (ကိး) စ့ၤမ့ထိအံၤ
လၢတၢ်ဂ့ၢ်မနုၤမနုၤန့ၣ် တပၥ်ဖျါဝဲ နီတမံၤဘၣ်န့ၣ်လီၤ.

စီၤတၢ်မျၢ်ဂီၤ (ကိး) စ့ၤမ့ထိ အဟံၣ်ဖိဃီဖိတဖၣ်စ့ၢ်ကီး တသ့ၣ်ညါဝဲ လၢတၢ်ဖီၣ်စ့ၤမ့ထိအံၤ လၢတၢ်ဂ့ၢ်မနုၤလဲၣ် ဒီး တၢ်လဲၤဖီၣ်ဃၥ်အီၤ လၢတၢ်လီၢ်ဖဲလဲၣ်န့ၣ် တသ့ၣ်ညါဝဲဘၣ်အဃိ အဝဲသ့ၣ်အိၣ်ဒီး တၢ်ဘၣ်ကိၢ်ဘၣ်ဂီၤ ဒိၣ်မးန့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၣ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ်, မူကီၢ်ဆၣ် ဒီး ဆီထံးကီၢ်ဆၣ် ဟီၣ်ကဝီၤပူၤ သုးမီၤစိရိၤ ဟံးဆူၣ်ထံကီၢ်တၢ်စိတၢ်ကမီၤ အသုးတဖၣ် ပၥ်ဖှိၣ်ထီၣ်အသးဒီး ပှၤလၢအအိၣ်ပှိၤ သုးမီၤစိရိၤအသုးတဖၣ်ဝံၤ ဟးလူၤဖီၣ်ဝဲ ကမျၢၢ်တဖၣ်န့ၣ်လီၤ.