လါယနူၤအါရံၤ ၁၁ သီ ၂၀၂၄ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ဖဲ ၂၀၂၄ နံၣ် လါယနူၤအါရံၤ ၁၁ သီအနံၤ လၢအမ့ၢ်ဝဲ ကညီဒီကလုၥ်နံၣ်ထီၣ်သီအမုၢ်နံၤအံၤ ဘၣ်တၢ်ရဲၣ်ကျဲၤမၤအီၤဖဲ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ကညီဘၣ်ခီဘၣ်ခဲဒဲကဝီၤအပူၤန့ၣ်လီၤ.

တၢ်မၤလၤကပီၤမူး အတၢ်ရဲၣ်တၢ်ကျဲၤအံၤ ဘၣ်တၢ်စးထီၣ်အီၤဖဲ ဂီၤခီ ၅း၃၀ မံးနံး ဒီးတၢ်ရဲၣ်တၢ်ကျဲၤအပူၤ ပှၤကယၢကယဲမူးန့ၣ် မ့ၢ်ဝဲ သရၣ်စီၤစူၣ်ခဲၣ် န့ၣ်လီၤ. တၢ်စးထီၣ်ဝဲ မၤလၤကပီၤအမူး ခီဖျိတၢ်ယူၥ်ထီၣ်နီၣ်တယၢ်ဆူ ထူၣ်အလိၤ ဃုၥ်ဒီး တၢ်အူထီၣ်ကွဲၤ ဝံၤသုးခိၣ်စိ စီၤဟဲဝါ ဟ့ၣ်တၢ်ကလုၢ်လၢ တၢ်ကဟ့ၣ်ထီၣ်တၢ်ယူးယီၣ်ဆူ ကညီဒီကလုၥ်အနီၣ်တယၢ် အဂီၢ်န့ၣ်လီၤ.


ဝံၤအလီၢ်ခံ ပှၤကယၢကယဲမူး သရၣ်စီၤစူၣ်ခဲၣ် ကတိၤအိးထီၣ်မူး ဒီး သရၣ်မုၣ် နီၢ်ဆၢထံဘၣ်ဒဲ ကတိၤဖျါထီၣ်ဝဲ ကညီနံၣ်ထီၣ်သီအိၣ်ထီၣ် အတၢ်စံၣ်စိၤတဲစိၤ ဒ်သိးပှၤလၢဟဲထီၣ်တၢ်မၤလၤကပီၤအမူးတဖၣ် ကသ့ၣ်ညါဘၣ်ဝဲအဂီၢ်န့ၣ်လီၤ. ဝံၤဒီး ပိၥ်ထွဲထီၣ်အခံလၢ တၢ်ဖးဖျါထီၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကရၢခိၣ် ပဒိၣ်စီၤကွဲၤထူဝ့ အလံၥ်ဟ့ၣ်ယုၢ် လၢအဟ့ၣ်ယုၢ်ဝဲဖဲ ၂၇၆၃ နံၣ် ကညီနံၣ်ထီၣ်သီ အနံၤန့ၣ်လီၤ. လံၥ်ဟ့ၣ်ယုၢ်အံၤ ဘၣ်တၢ်ဖးဖျါထီၣ်အီၤလၢ သရၣ်မုၣ် နီၢ်ထြံစၤ န့ၣ်လီၤ.



တၢ်မၤလၤကပီၤမူးအပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးခိၣ်နၢ်တဖၣ် ဒ်အမ့ၢ် ပဒိၣ်စီၤကျၢၤစ့ (ပှၤကတိၤတၢ်ပၢ, လီၢ်ခၢၣ်သးထီဘိကမံးတံၥ်ဖိ, ဝံစိၥ်တီဆှၢဒီး တၢ်ဆဲးကျိးကျဲ ဝဲၤကျိၤခိၣ်), ပဒိၣ်မါခဲနဒံၢ် (လီၢ်ခၢၣ်သးထီဘိကမံးတံၥ်ဖိ, ဘုၣ်ဖီၣ်မၤညၣ်ဝဲၤကျိၤခိၣ်) ဒီး တၢ်ဘူၣ်တၢ်ဘါခိၣ်နၢ် လၢအမ့ၢ် သရၣ်စီၤယ့ကၠဲၣ် တဖၣ် ကတိၤဟ့ၣ်ဂံၢ်ဟ့ၣ်ဘါဝဲ ထံဖိကီၢ်ဖိကမျၢၢ် လၢအဟဲထီၣ်တၢ်မၤလၤကပီၤမူး တဘျီအံၤတဖၣ်န့ၣ်လီၤ.

တၢ်ရဲၣ်လီၤကျဲၤလီၤဝံၤဒီး ပှၤကယၢကယဲမူး သရၣ်စီၤစူၣ်ခဲၣ် ကတိၤကျၢၢ်တံၢ်က့ၤဝဲ မူးဝံၤ တၢ်သးဝံၣ်ဝဲ ကညီဒီကလုၥ်အတၢ်သးဝံၣ် ဒီး တၢ်ဘူၣ်တၢ်ဘါခိၣ်နၢ် သရၣ်စီၤဆၣ်တူၢ်ဂီၤ ဆိၣ်ဂ့ၤပျၢ်က့ၤဝဲ မူးအတၢ်ရဲၣ်တၢ်ကျဲၤန့ၣ်လီၤ.

တၢ်မၤလၤကပီၤ ၂၇၆၃ နံၣ် ကညီနံၣ်ထီၣ်သီတဘျီအံၤ ကမျၢၢ်ဟဲထီၣ်ဝဲ ကအိၣ် ၅၀၀ ဃၣ်ဃၣ် ဒီး သူၣ်စၢ်သးဘီၣ်, ကၠိဖိမုၣ်ခွါတဖၣ် သးဝံၣ်မၤလၤကပီၤဝဲ ကညီနံၣ်ထီၣ်သီ လၢတၢ်သူၣ်ဝံၣ်သးဆၢအမုၥ် တဖၣ်န့ၣ်လီၤ.