Notice
လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အိးထီၣ်ဝဲ စၢၤသွဲၣ်သီခိၣ်နၢ်တၢ်မၤလိ (၁၀) ဝီတဝီအမူး
၂၀၂၄ နံၣ် လါစဲးပထ့ဘၢၣ် ၁၂ သီ, ခ့ၣ်အဲၣ်ယူၣ်-လီၢ်ခၢၣ်သး
ဖဲ ၂၀၂၄ နံၣ် လါစဲးပထ့ဘၢၣ် ၉ သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး တီခိၣ်ရိၣ်မဲဒီး ရဲၣ်ကျဲၤအိးထီၣ်ဝဲ ၁၀ ဝီတဝီ တၢ်သူၣ်ထီၣ်ခိၣ်နၢ်စၢၤသွဲၣ်သီတၢ်မၤလိ မူးအတၢ်ရဲၣ်တၢ်ကျဲၤ ဖဲ ကီၢ်သူလ့ၤတၢ်ပၢဟီၣ်ကဝီၤအပူၤန့ၣ်လီၤ.
တၢ်သူၣ်ထီၣ်ခိၣ်နၢ်စၢၤသွဲၣ်သီတၢ်မၤလိအံၤ ဘၣ်တၢ်တီခိၣ်ရိၣ်မဲအီၤလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ဒီး သးစၢ်လၢအဟဲထီၣ်မၤလိမၤဒိးတၢ်တဖၣ် မ့ၢ်သးစၢ်တဖၣ်လၢ အဟဲဝဲလၢ ကီၢ်သူလ့ၤတၢ်ပၢဟီၣ်ကဝီၤပူၤ ဒ်အမ့ၢ် ကီၢ်ရ့ၣ်သးစၢ်တဖၣ်, သုးက့သးစၢ်တဖၣ်, သုးဝဲၤလီၢ်ခိၣ်သ့ၣ်, လီၢ်ခၢၣ်သး, ကညီသးစၢ်ကရၢ ဒီး ကညီပိၥ်မုၣ်ကရၢ ခိၣ်နၢ်သးစၢ်သ့ၣ်တဖၣ်န့ၣ်လီၤ. သးစၢ်သ့ၣ်တဖၣ်အံၤ ကမၤလိဘၣ်ဝဲ တၢ်မၤလိဒ်အမ့ၢ် ထံရူၢ်ကီၢ်သဲး, သုးဂ့ၢ်ဝီ, ကညီတၢ်စံၣ်စိၤတဲစိၤ, တၢ်ပၢတၢ်ပြးဝဲၤဒၢးတၢ်ဖံးတၢ်မၤ ဒီး တၢ်မၤလိခိၣ်တီအဂုၥ်အဂၤအါမးန့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဂုၥ်ကျဲးစၢးဒုးအိၣ်ဖျဲၣ်ထီၣ်န့ၢ်ဝဲ ခါဆူညါသးစၢ်တဖၣ် လၢကတီခိၣ်ရိၣ်မဲက့ၤ ပပှၤကလုၥ်ဒီးမၤလၢပှဲၤက့ၤ ကညီတၢ်ပၢၢ်ဆၢအဂီၢ်န့ၣ်လီၤ.
စၢၤသွဲၣ်သီခိၣ်နၢ်တၢ်မၤလိကၠိအံၤ ပှၤလၢအရဲၣ်ကျဲၤဒုးအိၣ်ထီၣ်ကၠိအခီၣ်ထံးကတၢၢ်န့ၣ် မ့ၢ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှးလါဖါ ဒီး ကၠိအံၤဘၣ်တၢ်အိးထီၣ်အီၤ အခီၣ်ထံးကတၢၢ်တဘျီဖဲ ဒူပျၥ်ယၥ်ကီၢ်ရ့ၣ် ဝီၤလ့ၢ်ခံ တၢ်လီၢ်န့ၣ်လီၤ. ဖဲ ၂၀၂၄ နံၣ် လါယနူၤအါရံၤ ၂၂ သီအနံၤန့ၣ် တၢ်ပျၢ်ကွံၥ်ဝဲ ၉ ဝီတဝီ စၢၤသွဲၣ်သီခိၣ်နၢ်တၢ်မၤလိကၠိဖိတဖၣ် ဒီး ခဲအံၤ တၢ်အိးထီၣ်ကဒီး ၁၀ ဝီတဝီ စၢၤသွဲၣ်သီခိၣ်နၢ်တၢ်မၤလိကၠိ အတၢ်ရဲၣ်တၢ်ကျဲၤန့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
